Okinawa 2015 - Day 4

Day 4 - 22.10.2015 (星期四)

酒店 --> Outlet Mall --> 那霸機場 --> 香港

(原定行程 : 酒店 --> 西松屋 --> 那霸機場 --> 香港)

今日多雲, 天陰, 有雨!

食完早餐返房拖埋D行李去大堂, 準備check out! 由於多咗兩件大型行李(兩個 car seat), 我將孖寶兄弟同我地D行李merge做一個喼, 勁! (人家去旅行, 一個喼去, 兩個喼返, 我地啱啱相反, 越去越少野!)

老公負責搬行李上車, 我負責埋單, 三晚酒店, 兩間雙人房, 合共108,000円(折合港幣$6,800, 抵!) 搞完一大輪, 差不多11:30出車, 連原定的西松屋都去唔到, 尋日行咗Birthday, 算啦! 嫲嫲同姑媽極力主張直踩機場 (其實我地搭下午4點機, 可以2點先至去到機場check in)。下午1點已經去到機場附近, 由於時間尚早, 於是去outlet mall行吓, 順便去個廁所, 睇過波鞋同運動風褸, 唔算特別平, D款好難頂, 實在買唔落手, 半個鐘後上返車, 去返OTS還車, 再搭shuttle去機場離境大堂。

可能早咗到, 冇乜人, 好快就安排好行李寄倉, 兩個car seat順利過關, 冇額外charge, yeah! 爸爸話賺返孖寶D機票錢返黎! hoho... Check完in後去食午餐, 好欣賞日本機場/主題公園入面D食肆, 價錢唔會貴過出面好多, 唔似得香港咁, 斬到你一頸血!

食完午餐入閘, 仲有大把時間, 加上班機delay咗20分鐘, 嫲嫲姑媽繼續血拼, 媽媽都買多少少手信俾公公婆婆, 4:35pm, 終於可以上機, 飛機起飛冇幾耐, 孖寶兄弟就暈咗! 細佬臨落機時又係爆喊, 不過, 今次冇咁勁 (爸爸俾部pad佢玩), 可以自己坐返低, 但就不停叫媽媽抱抱...... 媽媽惟有安慰佢, 架飛機一停定就抱佢!

 哥哥瞓到飛機降落, 勁!

 哥哥好開心見返自己個car seat, 大叫: 我地架! 我地架!

 好在爸爸架車都載得落兩個car seat

 少得可憐的戰利品

Okinawa 2015 旅程完結

後記:
爸爸返到香港當晚話, 都係返到黎最舒服, 同佢地去旅行真係好辛苦, 都係過多幾年, 等佢地大D先至再去 (媽媽聽到又有幾年冇得去旅行, 當然係好唔開心啦! 但不得不承認, 帶孖寶兄弟去旅行真係好辛苦!) 不過, 第二日, 爸爸整理緊旅行D相, 睇返又覺得好開心 (都話影相係最唔真實的記錄, 永遠都只有開心的回憶, 唔開心的, 你都唔會影啦!) 係親子之間的美好回憶, 於是又話下次再去旅行, 最多辛苦D囉!

Okinawa 2015 - Day 3

Day 3 - 21.10.2015 (星期三)

酒店 --> 海中展望塔+玻璃底船 --> Neo Park --> 酒店

(原定行程: 酒店 --> Neo Park --> 兒童王國 --> 美國村 --> 酒店)

孖寶兄弟今日又係瞓到差不多9點先至起身, 食完早餐, 去酒店個兒童playground玩一陣, 又係差不多11點先至出發, 今日天氣仲好過尋日, 冇乜雲, 陽光普照, yeah!

揸咗45分鐘車, 終於去到海中展望塔出面個公園, 仲要搭shuttle, 就係呢架, 仿古典, 好靚!

首先去坐玻璃底船, 全程約20分鐘 (但我就覺得冇喇, 因為好快睇完), 不過架船靚過泰國果D好多, 同埋真係睇到魚, 係好多魚! (我諗個船底應該有魚餌引D魚游埋黎), 船上有人買魚糧餵魚, D魚游晒上水面度爭食, 本來都想買俾孖寶兄弟試吓, 點知船長話夠鐘要回程喇!

 真係好多魚喎!

上返岸, 行去睇海中塔, 條路勁曬, 冇遮蔭。一早預計到海中塔冇料到, 結果係冇魚睇, 條樓梯仲要行餐死!

 到此一遊相

離開時大概1:00, 大家都唔肚餓, 於是決定去咗Neo Park先再搵野食, Neo Park係一個'好雞'的禽鳥公園(都預咗! 叫做孖寶兄弟未見過, 俾佢地睇吓雀仔咋), 點知入到去公園, D雀仔唔係個籠入面, 而係走晒出黎, 媽媽諗住買包糧俾佢地餵吓雀仔, 哥哥初時都夠膽餵, 點知我地俾D雀仔圍攻, 其中有一隻仲好惡, 大家開始速逃!  哥哥坐係BB車上面唔肯落地, 細佬就要嫲嫲抱住!

 兩公婆惟一的合照

 俾雀仔圍攻

行咗大半個鐘, 哥哥開始眼瞓, 但係我地要坐觀光火車仔(因為買咗飛)

坐完觀光火車(其實只係坐係度再兜多一次個公園), 孖寶兄弟見到呢架Thomas火車就興奮到大叫, 200円坐一次兜咗兩個圈, 全日的行程, 孖寶兄弟只係記得坐過Thomas火車, 咩睇魚魚, 睇雀仔, 完全冇印象! (媽媽特登安排佢地今日著Thomas衫, 就係諗住襯返呢架Thomas火車)

下午3:30離開公園, 係公園入口隔離見到好似有D商店同有野食, 於是即刻泊低架車係停車場, 去咗食拉麵, 今餐應該係旅程中最好味的一餐!

食完拉麵, 行返出黎就見到有間店舖叫"Birthday", 之前睇其他人D Blog知道呢間野係專賣BB衫褲鞋襪同日用品, 媽媽興奮到飛跑入去, D衫唔貴, 但一摸上手的質料就知道係深水埗街邊貨, 決定放棄, 最後只係買咗寫明係Made in Japan的Thomas碗、碟、餐具, 2條新幹線毛巾仔同2隻襪(made in china)......好失望! 爸爸都揀咗2條新幹線吹泡泡玩具俾孖寶!

 又係有兒童playground

差不多6點, 嫲嫲, 姑媽同爸爸去超市買生果, 飲品, 媽媽留係車度陪伴瞓著咗的孖寶 (爸爸乘機買咗個生日蛋糕俾媽媽), 買完野, 揸車返酒店, 因為酒店送咗免費自助晚餐coupon, 唔好浪費! 晚上7:30返到酒店, 上房拎埋coupon落去食飯, 自助餐質素一般(預咗, 因為係免費), 但都食得飽, 然後就係切蛋糕同影相時間, 大家都好開心! 多謝老公的安排!

孖寶兄弟最鍾意吹蠟蠋

食完飯, 媽媽去酒店大堂的商舖買手信俾婆婆, 爸爸就帶孖寶去"揸巴士"!

返上房沖完涼, 仲有乳酪, 生果同橙汁, 好滿足!

旅程至今的戰利品, 少得好可憐啊!

Day 3 完結

Okinawa 2015 - Day 2

Day 2 - 20.10.2015 (星期二)

酒店 --> 海之美水族館 --> Aeon Mall --> 酒店

(原定行程: 酒店 --> 海中塔+玻璃底船 --> 海之美水族館 --> 酒店)

尋晚孖寶兄弟12點瞓, 媽媽由於瞓得唔好 (細佬仔半夜無啦啦擘大眼, 爆喊, 媽媽差D想車巴佢!), 所以8點左右已經醒咗, 刷牙洗面換衫裝身, 搞掂晒, 佢地仍然未有起身的跡象, 仲唔起身, 就黎邊度都唔駛去喇! 結果等到9點, 孖寶兄弟終於起身。

孖寶兄弟唔刷牙唔洗面就落去食早餐, 食完仲要係酒店個兒童playground玩咗一陣。

結果搞到11點先至出發, 比原定時間遲咗足足一個鐘, 由於太遲出發, 今日只好放棄玻璃底船, 直接去海之美水族館。

到達海之美水族館, 已經係中午12:30。

入到水族館冇幾耐, 細佬就開始扭計, 要媽媽抱, 又要媽媽幫佢推埋架車(佢架車係問酒店借, 好後悔借多架車, 仲麻煩咗!), 由於細佬越扭越勁, 連媽媽都發炮鬧佢, 最後要爸爸出手收拾殘局, 但已經掃晒興, 乜魚都睇唔到!  行到去餐廳門口, 見價錢合理, 又可以一邊睇魚一邊食野, 於是全家即刻衝入去搵返個坐係大魚缸隔離的座位。

不過, 買野食真係排咗好耐, 爸爸同姑媽好似去咗半個鐘先至買到幾碟意粉同炒飯返黎, 但份量真係少得好可憐, 食唔飽, 要爸爸再去買過, 又排咗20分鐘, 咁就搞到下晝3點, 只係睇咗鯨鯊同食咗個午餐。

之後行去睇海豚訓練, 孖寶兄弟第一次咁近距離睇海豚, 以為佢地會好興奮 (媽媽都係第一次咁近睇海豚咋), 點知佢地呆晒......

跟住去體驗餵海豚, 佢地又係呆晒......

D海豚好可愛啊!

睇完海豚表演, 4:30就離開, 揸車去Aeon Mall, 揸咗好耐, 全車人都瞓到如火如荼 (只有爸爸冇得瞓, 好可憐啊!)

接近黃昏6:00, 終於去到Aeon Mall

由於下午食得唔飽, 加上我同老公有重要任務在身(要去買car seat), 所以求其係food court食咗餐飯就算, 我同老公各自叫咗魚生飯, 超級難食, D飯係普通飯(唔係壽司飯), D豉油係普通豉油 (唔係魚生豉油), 好離譜!

孖寶兄弟見商場入面其他小朋友都坐住呢款手推車, 嚷著要坐, 見到佢地眼有淚光咁羨慕其他小朋友, 食完飯媽媽即刻拖住佢兩個落返地下, 飛奔去搵2架手推車俾佢地(全場得返2架咋!), 佢地開心到震! 然後直接搭lift上四樓的玩具反斗城。

可能睇car seat實在太悶, 哥哥開始扭計 (細佬就好乖, 仲幫手試car seat), 由於要係計時炸彈爆炸之前離開現場, 爸爸媽媽唔再諗咁多, 就決定買呢張Recaro Start J car seat (香港賣緊HKD2700, 呢度買計返都係HKD1600, 買2隻已經賺返張機票錢返黎), 於是同售貨員講買2張, 打包返香港 (雞同鴨講之下, 知道原來冇其他顏, 得紅色, 是但啦! 買咗唔信哥哥唔坐)。結果爸爸就係一遍喪喊聲之中去收銀處俾錢, 然後推住2大個箱落返樓下同嫲嫲姑媽會合。連細佬一直嚷著要食雪糕都冇機會買俾佢食 (sorry呀!)

返到酒店又係差不多晚上10點, 細佬一個人坐係車尾, 加上返酒店條小路冇街燈, 好黑, 細佬驚到係架車入面大喊, 返到酒店, 媽媽即刻抱抱安慰, 仲買咗杯雪糕氹返佢。

沖完涼仲要食乳酪同生果(因為細佬已經兩日冇poo poo喇!), 結果孖寶兄弟又搞到差不多12點先至瞓! (媽媽就黎暈低喇!)

Day 2 完結

Okinawa 2015 - Day 1

終於有機會係孖寶兄弟個Blog寫遊記, 今次係孖寶兄弟人生第一次去旅行, 亦係媽媽期待已久的旅行 (因為2012年4月去完大阪賞櫻返黎就發現有咗, 已經有3年半冇去過旅行喇! 媽媽覺得自己好慘, 亦好羨慕甚至妒忌人家可以一家四口去旅行), 媽媽今次終於得償所願, 多謝爸爸的安排!

Day 1 - 19.10.2015 (星期一)

香港 --> 那霸 --> 國際通 --> 殘波岬皇家酒店

出發前一晚, 媽媽可能太興奮, 瞓唔著, 當日早上, 孖寶兄弟都好早起咗身, 不過, 諗住去到機場check in後仲有大把時間, 於是爸爸媽媽冇食早餐(諗住留返係機場食個豐富早餐先至上機), 孖寶兄弟就飲咗包維他奶, 點知佢兩個臨出門口為咗邊個推喼問題發生爭執, 扭咗一大輪, 搞到遲咗出門口, 去到機場check in, 已經夠鐘入閘, 結果爸爸媽媽好肚餓咁上咗機!

 上機前必影打咭位

 第一次坐飛機, 孖寶兄弟好開心

上機冇幾耐, 哥哥就瞓咗, 細佬冇瞓, 仲食咗成個包 (冇錯, 呢間航空公司冇飛機餐食, 只有一個包 + 清水, 我認為自己搭緊廉航, 但老公話張機票一D都唔"廉"架!)。臨落機, 哥哥醒咗, 由於好肚餓, 佢自己揸住個包係咁食, 食咗半個, 細佬可能比較敏感 (或者就黎降落, 耳仔痛), 突然爆喊, 扭抱, 但就黎落機, 連空姐都坐定定綁咗安全帶, 我地俾人命令要坐返低, 惟有將細佬綁返係張凳度, 同埋不停咁安慰佢! 而佢就繼續喊到拆天!

落咗機, 過關, 拎行李, 去租車, 竟然用咗個半鐘, 唔知點解咁耐!

去到國際通(只係20分鐘車程)已經接近晚上6點。

由於媽媽全日只係食咗2個包同飲咗2杯水, 媽媽好肚餓, 開始想發癲, 爸爸聞到火藥味, 拿拿林決定去返上次間餐廳食燒石垣牛 (其實上次已經覺得不外如事), 一行6人叫咗3個set (好佩服日本餐廳侍應冇黑面), D肉好鞋好UN, 又食唔飽(是常識吧!) 盛惠13,500円 (折合港幣$850, 老公心裏面已經講晒粗口!)

食完飯, 嫲嫲同姑媽要去買手信(因為只有Day1係國際通, 之後幾日都唔會有機會去到買手信, 於是兩個女人走去血拼, 我就去搵尿片, 成個國際通的藥房都冇尿片賣 (當然啦! 已經俾強國大媽掃走晒!)  好在揸車返酒店途中買到尿片!

三個女人去咗血拼, 爸爸負責照顧孖寶

上車離開國際通之前, 爸爸, 媽媽同細佬仲share咗一個雪糕pancake (哥哥瞓咗冇得食)

返到酒店已經接近晚上10:30, 孖寶兄弟入到房見到張大床就即刻醒晒(細佬本來半夢半醒), 興奮到傻咗, 然後當然要上去跳返一大輪!

媽媽幫佢地沖完涼(佢地唔肯用花灑沖涼, 要係浴缸開1/3盤水), 自己先至可以沖涼, 等佢地瞓咗(接近12點), 仲要洗埋D碗, 執D衫出黎, 先至休息, 當時已經接近零晨1點。

Day 1 完結

產後抑鬱? (6)

已經唔係第一次, 好多次都係咁, 點解唔體諒一下我?

我唔係話我發脾氣鬧仔係啱, 但係果刻我真係好'慶'(已經忍咗好耐, 忍唔住爆), 仲要火上加油, 話我做乜發脾氣, 細路仔係咁, 你嬲佢做乜? 仲要係兩個仔面前話: 係咁架喇! 你阿媽係冇乜耐性!

每個人都有情緒, 每個人都有limit, 果刻忍無可忍到limit就會爆, 你自己都係咁啦! 我果刻有冇即場話你好打個仔呀?

尋晚食飯時, 你話你頂唔順, 唔想再理個仔, 我有冇同兩個仔講: 係咁架喇! 你老豆係冇乜耐性! 我都係同你講: 啱架喇! 你頂唔順俾我啦! 我頂唔順就你頂上啦! 大家輪流冇咁辛苦!

相反... 你點對我呀? 我頂唔順, 鬧咗個仔一句啫, 你就數我, 仲要係兩個仔面前數我, 其實我每次最嬲唔係個仔(我只係嬲佢地一陣啫), 我最嬲係你冇體諒過我, 你唔係話阿仔唔啱, 唔應該搞住媽媽喎, 你反而係話我唔啱, 唔應該係呢個時候做埋呢D野, 咁我想問吓, 我仲有咩時間做呀? 返工已經好辛苦 (我唔係話工作量, 或者係體力勞動, 而係我的工作種類同老闆俾我好大壓力), 每晚返到屋企, 仲要check阿仔書包, 簽通告, 叫佢地或幫佢地做功課, 我知呢D係做人阿媽的責任, 我冇叫你幫手,但你可唔可以體諒吓我呀?

人地話男人教仔, 女人唔好出聲, 因為做阿爸要有尊嚴, 女人出聲幫住個仔, D仔以後唔識得尊重個阿爸! 所以你出聲教仔, 甚至打仔, 我都忍住唔出聲, 企埋一邊心痛, 最多等你打完鬧完抱返佢地, 到臨瞓時如果你入房, 就同你講: 好似咁樣打鬧佢地唔係咁好喎!

你已經唔係第一次係兩個仔面前數臭我, 我每次聽到都好嬲, 我唔係嬲兩個仔百壓, 搞住我, 係嬲你點解冇企係我果邊, 幫我諗吓, 體諒吓我有時都會忍唔住發脾氣?

孖寶第一次去海洋公園!

星期六係爸爸生日, 去海洋公園可以免費入場, 於是就叫埋嫲嫲, 一家五口一齊去玩一日!

因為要玩成日, 驚佢地中午扭計要瞓覺, 所以爸爸上網用$100買咗架二手BB車

出發前幾晚, 媽媽brief一下細佬

媽媽: 我地星期六holiday, 去海洋公園好唔好?
細佬: 好呀! 帶埋滑板車去!
媽媽: (偷笑) 海洋公園有好多野玩架! 唔駛帶滑板車...
細佬: 咁帶埋BB車去!
媽媽: (心諗: 咁醒? 你又知我會帶?!)
過咗一陣......
細佬: (聽到電視新聞報導熊貓小產...) 佢講海洋公園喎! (xN次)
媽媽: 係喎! 我地去探佢 (指住個電視), 除咗熊貓, 仲有big fish睇!

星期六早上9:45am出發, 去觀塘接嫲嫲, 因為東區走廊有D塞車, 差不多11點先至去到, 好在停車場仲有室內泊車位 (日泊盛惠$150, 4年前同老公去係$70)

泊咗車, 爸爸去換飛, 嫲嫲, 媽媽, 孖寶係門口影相, 後來有個職員主動走黎幫我地揸機, 當然之後佢又用佢部機幫我地影, 仲叫我地去埋邊揀相, 嫲嫲媽媽受唔住引誘, 買咗3張相 (盛惠 $446)

入到公園仍然係龜速前進, 因為周圍都太吸引, 加上要食晒包樂天熊仔餅先至可以入場館參觀, 搞咗2個幾鐘先至睇咗海洋館同熊貓館, 兩兄弟本來嚷著要搭吊車, 點知排隊時已經體力不支暈咗, 好在有帶BB車, 推住一個, 另外輪流抱住一個, 等咗20分鐘終於上咗吊車, 兩兄弟都醒咗, 好興奮!

上到山頂已經接近2點, 媽媽肚餓到就黎發顛, 睇咗幾間餐廳, 閒閒地食個烏冬/叉燒飯都要 $150, 惟有派爸爸去買M記 (盛惠$200)

食完午餐已經2:50點, 細佬一直嚷著要去玩摩天輪, 於是就一齊去玩咗一轉,然後去海洋劇場坐定定等睇show, 3:30開始, 等咗半個鐘, 過晒時, 兩兄弟已經唔耐煩, 加上只係得3條海豚游游吓, 間中飛上黎水面, 細佬已經嚷著要走, 哥哥就呆晒, 冇晒反應!

睇完海豚表演已經接近4pm, 個天開始天陰, 想落雨, 加上兩兄弟開始扭計要瞓覺, 於是都係落山走人! 由於太多人等吊車, 我地要行返上山搭海洋快線, 好在推住BB車可以行特快通道, 好快就落咗山, 但係兩兄弟瞓晒, 連旋轉木馬都玩唔到, 5:30就離開海洋公園 (唔知點解要成個半鐘先至可以落到山走人?)

人生去咗咁多次海洋公園, 今次係第一次玩咗咁少野就走(全日只係去咗海洋館, 熊貓館, 坐吊車, 坐摩天輪, 睇海洋劇場, 同埋坐海洋快線), 集古村同兒童王國又冇去到, 鯊魚館, 水母館都唔知係邊, 企鵝, 樹熊又冇睇過, 其他機動遊戲全部都冇玩過...

細佬由山頂瞓到上車, 再由上車瞓到屋企樓下停車場, 哥哥就係回程途中瞓咗, 瞓到返屋企張sofa, 本來諗住同細佬落街食飯, 點知臨出門口, 哥哥醒咗, 要一齊落去!

最後一家四口落咗樓下食日本野, 仲叫咗個抹茶新地同爸爸慶祝生日, 幸福的感覺同個抹茶雪糕一樣咁甜!!!

爸爸食完飯仲去咗買對波鞋俾自己做生日禮物!

孖寶兄弟2歲10個月喇!

孖寶兄弟的近況

體重:

哥哥25lbs, 好似同半年前冇咩分別, 塊面就越黎越V, 連個招牌面珠登都冇埋, 所以我成日叫佢食多D野, 食返個面珠登出黎, 佢覺得面朱登呢個term好好笑, 我講親佢都笑唔停!

細佬27lbs, 細佬肯食飯, 呢個星期食完飯仲要自己去廚櫃拎兜零食出黎, 又食月餅, 朱古力餅, 鳯梨酥, 芝士圈, 仲話要食埋公公送的蛋糕仔, 佢好食得, 所以塊面仔越黎越圓, 抱上手都好重吓!

語言發展:

哥哥都有繼續有進步, 佢開始知道爸爸媽媽發嬲鬧佢, 佢會問, 媽媽做咩事鬧我? 媽媽做咩咁惡? 叫佢同細佬相量吓睇咩電視, 佢會望住細佬講: 睇Thomas, 細佬會答佢: 好呀! 不過, 佢好多時仍然係活係自己世界入面, 答非所問, 問佢今日學校做咗咩? 佢呆晒, 一係就話唔記得咗!

細佬學咗好多大人講的說話, 有次佢同哥哥爭個紙燈籠, 媽媽一怒之下撕爛咗, 佢竟然喊住話: 媽媽下次唔好喇! 下次唔好撕爛佢! 尋晚食飯時, 講起爸爸星期六生日, 我話買個生日蛋糕俾爸爸, 我地切蛋糕影相, 佢同爸爸講: 咁你記住要笑喎!  細佬講野亦好有邏輯, 有次媽媽講故事, 問佢地: BB做咩事會喊o既? 佢竟然識答: BB肚餓! (勁!)

家人關係:

哥哥呢排痴返爸爸, 乜都要爸爸, 有時仲要姐姐, 我呢個媽媽, 俾打入冷宮! 佢都好錫細佬, 成日話要同細佬結婚, 笑死我!

細佬仍然好痴媽媽, 暗地裏好憎爸爸, 不過呢排多咗痴姐姐(以前話要打死姐姐, 姐姐曳曳), 可能因為媽媽呢排多咗鬧佢!

兩兄弟越黎越多互動, 一齊玩, 一齊唱歌, 一齊跳舞, 呢排最鍾意玩角式扮演 (1) 輪流扮跌低, 另一個扮消防員'拯救'(扶起)佢 (2) 一齊企係走廊門口扮老師, 然後叫媽媽扮同學, '同學'要同'老師'講午安, 然後'老師'讚'同學'有禮貌, 再由'老師'帶'同學'入'課室'(黑房)......

細佬明顯比以前更加錫哥哥, 尋晚食飯, 哥哥瞓咗覺, 佢話要留返D燒鴨俾哥哥, 一包餅有2塊, 佢話要同哥哥share, 一人一塊, 仲要等埋哥哥食完飯先至開黎食, 唔會自己食咗先, 爸爸買咗架二手士的車返黎, 哥哥坐上去, 就黎反去後面, 佢即刻扶住架車, 好驚哥哥跌親!

見到佢兩兄弟咁手足情深, 爸爸媽媽都老懷安慰!

戒片!

自從BBS踏入一歲開始, 就有好多野要戒: 戒奶樽, 戒奶咀, 戒啜紗巾, 戒片...

1) 戒奶樽

根據健康院指引, 奶樽只可以用到18個月大, 因為繼續用奶樽飲奶, 小朋友好易蛀牙, 細佬一向冇啜奶咀的習慣, 所以首先戒到, 方法係仍然用奶樽, 不過唔用奶咀, 改為用飲筒, 細佬好like用飲筒, 所以幾日就戒咗, 哥哥因為有啜奶咀的習慣, 所以比較抗拒唔用奶咀飲奶, 初時仍然好堅持, 但最後都戒咗, 之後就轉用杯 + 飲筒飲奶, 到而家2歲10個月仍然係用飲筒, 唔肯直接拎起個杯黎飲, 唉!

2) 戒奶咀

其實好多人話1歲前就要戒, 因為會哨牙, 我聽咗都係一笑置之, 直至哥哥仆斷咗對門牙, 醫生話佢之前可能有少少哨牙, 所以先至咁易仆斷, 我先至信啜奶咀會哨牙, 不過, 門牙都斷咗, 哨唔哨牙而家都冇關係, 哥哥係2歲4個月時用咗4日戒奶咀, 比我預期中快, 不過, 搞到2歲先至黎戒奶咀, 做媽媽的我, 實在係有D失敗!

3) 戒啜紗巾

啜紗巾係細佬仔的標記, 由幾個月大已經開始啜, 因為佢唔識啜奶咀, 成日跌, 成日要幫佢執返, 但係其實啜紗巾仲衰過啜奶咀, 奶咀都還會用高溫消毒, 紗巾好污糟, 個工人又洗得唔乾靜, 殘留咗好多洗衣液, 細佬仔應該食咗唔少落肚, 慢性中毒, 都係媽媽的錯!

4) 戒片

應該係難度最高的項目! 親戚朋友D女, 個個都好細個就成功戒咗, 一歲半就識得去廁所同自己抺pat pat, 我2個仔, 2歲10個月仲著住條尿片, 試過N次同佢地講: 「大個仔喇! 唔著片片, 要著底褲, vee vee同poo poo要去廁所, 爸爸媽媽都係咁架! 你去到廁所, 媽媽請你食朱古力吖! 條片片up住個pat pat, 搞到紅晒, 好痛, 好唔舒服!」諸如此類的說話, 但係佢地都非常抗拒, 甚至就黎沖涼, 叫佢地除咗條片一陣, 佢地都大發雷霆!

直至佢地今年9月返學, 老師係學校叫佢地嘗試去廁所同著底褲, 佢地開始冇咁抗拒, 細佬仲係9月23日成功係學校個廁所vee vee, 雖然都有賴濕過無數次, 但總算肯除咗條片著底褲, 於是爸爸媽媽都係10月1日開始, 日間係屋企叫佢地唔好著片, 改為著底褲, 要屙vee vee或者poo poo就同爸爸媽媽講, 兩個初頭都有D抗拒, 著咗一陣底褲就嚷著要著返片片, 爸爸惟有氹佢地著底褲有得打機, 細佬好成功, 就算佢肚屙, 一日屙咗5-6次, 都冇失手, 但哥哥就有少少抗拒, 唔肯係potty屙, 賴咗poo poo落底褲都唔講, 不過, 屙vee vee都肯去尿兜, 仲要次次去完都要爸爸去睇吓, 然後大讚佢!

總算踏出咗第一步... 爸爸話希望佢地用半年時間可以戒到片啦!

後記@28.4.2016
孖寶兄弟真係用咗半年時間, 戒咗日間要著尿片的習慣(午睡除外), 而家連外出搭長途車都唔駛著片, 只係著底褲, 而且從未賴濕過, 叻叻!

後後記@6.7.2016
孖寶兄弟連搭飛機去旅行都唔駛著片喇! 叻叻! 不過午睡仍然要著尿片, 細佬試過要求唔著尿片午睡, 冇賴到, 好叻! 不過, 亦試過著底褲係Sofa午睡, 結果兩個都賴濕晒! 至於夜晚仍然係要著尿片, 都差不多4歲, 仲未戒到夜片, 仲要每朝早條片都好濕晒, 好重!