認識主(1)

話說佢地仲係BBS的時候, 媽媽已經教佢地食飯前禱告, 合埋眼, 'dup'低頭, 謝謝主! 阿們! 媽媽得閒又會同佢地講聖經故事, 希望慢慢滲D滲D, 等佢地認識主! 不過, 由於佢地當時實在太細個, 跟本唔明白, 亦冇心機聽你講!

媽媽覺得呢D野都急唔黎, 亦唔可以硬sell(驚佢地反感), 於是提議一家四口每晚臨瞓前一齊禱告, 細佬比較乖, 通常都肯一齊禱告, 哥哥就坐唔定, 搞呢樣搞果樣, 而家每次話禱告, 佢就話要瞓覺(撒旦的工作真係厲害! 撒旦, 我命令你離開我個仔, 退去吧!)

孖寶兄弟慢慢長大, 開始懂事, 細佬最近成日話想睇耶穌(即聖經故事, 但係唔知點解佢會知果個叫耶穌), 媽媽會指主本書問佢地邊個係耶穌呀? 媽媽又會同佢地講, 耶穌已經復活升天, 所以耶穌而家住係天空上面喇!

有一次, 細佬唔見咗架車車, 媽媽就把握機會, 叫佢禱告, 叫耶穌幫佢搵返架車車, 佢竟然對住本書上面的'耶穌'大叫, 搵返架車車! 第二日, 工人姐姐幫佢搵返架車車, 爸爸媽媽當然把握機會同佢講, 係耶穌幫你搵返架! 你要謝謝主喎!

尋晚食飯, 細佬留意到爸爸未禱告就食飯, 即刻大叫: 爸爸未禱告! 哥哥都自言自語話要禱告!

總算叫做認識主! 不過, 距離明白救恩同得著救恩, 仍然好遙遠, 但已經係好好的開始!

孖寶兄弟2歲6個月27日!

又要update一下孖寶兄弟的發展情況, 因為佢地實在發展得越黎越快。

1.  體格

身高方面, 爸爸幫佢地度過, 好似比上個月高咗1cm (有冇咁多呀? 係唔係度錯呀?), 不過, 對腳仔又真係好似長咗, 因為終於夠長踩三輪車喇! 至於體重方面, 哥哥25.6 lbs, 細佬26.4 lbs (細佬好食得, 所以重過哥哥差不多一磅, 但就咁睇落去, 哥哥就好肉地過細佬!)

2.  心智

同理心方面, 細佬見到爸爸爬上條梯度整冷氣, 突然講咗一句: 「爸爸, 做咩爬上去? 逸逸驚你跌落黎!」(嘩! 竟然識得關心爸爸, 爸爸冧晒!)

兩個都識得氹人開心, 知道爸爸媽媽見到佢地個chok樣會哈哈大笑, 就成日整chok樣氹你開心!

有時佢地整親媽媽, 媽媽會話痛痛, 叫佢地"呵"返媽媽痛痛果度, 佢地都識, 有時唔駛叫, 都會主動"呵"返你! 哥哥成日無啦啦咬細佬, 媽媽叫佢要同細佬say sorry, 同埋"呵"返細佬!

3.  語言

兩兄弟都開始識得打開話題, 唔再只係人地問佢地答。當佢地見到一D未見過的野, 佢地會主動問: 咩黎架? / What's this?  夜晚見到天上有星星月亮, 會主動叫你去睇!

細佬尋晚留意到爸爸食飯前未禱告, 佢即刻話: 爸爸未禱告! (細佬D觀察力好強)

好鍾意唱歌, 無啦啦行行吓街唱歌, 但要聽好耐先知佢地唱乜!

有研究發現, 學前階段越聽得多爸爸媽媽講野, 學多D生字, 大個會叻D喎, 所以媽媽而家同佢地講野, 都會當佢地大人咁(唔好諗住佢唔明就唔講), 同埋盡量講長D, 用多D唔同的詞語去表達。

4.  人際關係

兄弟關係方面, 兩兄弟多咗一齊玩, 例如, 停車場, 砌LEGO, 保齡球, 砌路軌, 煮飯仔, 有時哥哥整唔到D野, 會叫細佬幫佢, 有時, 哥哥整錯咗, 細佬又會睇唔過眼幫佢整返, 不過, 通常玩玩下又爭玩具(細佬多數會讓哥哥, 好乖!), 但係喊完又冇野, 又一齊玩! (兩兄弟就應該係咁, 希望佢地大個咗有共同興趣, 可以從小建立深厚的感情啦!)

親子關係方面, 兩兄弟仍然係鍾意痴住媽媽, 一定要媽媽抱抱, 可能爸爸有時玩得太顛, 整喊佢地, 所以佢地潛意識入面都係話爸爸曳曳!

分享方面, 哥哥通常都比較大方, 肯請爸爸媽媽食佢食緊的野(可能因為哥哥本身對食野冇乜興趣), 細佬呢! 問多兩句都肯俾你食, 不過佢只會搣少少俾你(一粒餅碎左右)!

朋輩方面, 去玩具反斗城或落會所玩, 有其他小朋友係度, 就以為其他小朋友一定會走過黎搶佢地D玩具, 成日會講: 「小朋友, 唔准XXX!」

然然牙科覆診(1)

2015年6月24號早上11點帶然然去灣仔麥理浩政府兒童牙科覆診, 冇咗上次個高級醫生, 得返另一個都老老地(見佢有D白頭髮)的醫生。

上到去診所登記, 等咗一陣就叫然然個名, 姑娘帶我地入房, 問然然叫咩名, 然然諗咗一陣, 答: 唔記得! 笑死個姑娘! 不過, 然然比上次進步咗好多, 起碼入到房冇第一時間爆喊! 佢入到房見到醫生, 走埋去同醫生講: 唔駛驚驚! 唔駛喊喊! (笑死媽媽, 可能因為今次預先同佢講咗要睇牙醫, 等佢有晒心理準備), 醫生問佢牙仔有冇痛呀! 佢識答: 冇! (但係同佢刷牙又係咁話痛喎!)

跟住爸爸抱然然一齊瞓係張治療椅上面, 然然雖然有D驚, 但冇喊, 只係合埋對眼(好實), 醫生同姑娘都讚佢叻叻! 不過, 當醫生擘開佢個口睇佢D牙, 佢就開始喊, 不過, 爸爸媽媽都同佢講, 唔痛架! 冇野喎! 醫生睇吓咋! 佢就冇再喊喇!

醫生話然然暫時未生牙瘡(但仍然好大機會生!), 上次補牙D物料已經甩晒, 要再補過, 今次要補多D, 大pat D, 之後媽媽問醫生係唔係應該照吓X光睇吓有冇斷牙腳之類, 醫生話其實都要, 不如試吓, 去咗另一間房, 爸爸抱住然然坐低, 但係姑娘要然然咬住張咭紙(仲要用個膠袋包住), 然然話唔食得, 吐返出黎之後就唔再肯咬住, 結果失敗! 照唔到X光!

醫生話3個月後再覆診, 到時再睇情況點樣, 如果生牙瘡的話, 佢會好痛, 要食止痛藥, 等牙瘡謝咗, 神經線都死晒後, 先至可以杜牙根/剝咗佢(媽媽當然唔想然然做冇牙仔啦!) 但佢咁細個, 唔會合作, 醫生話聞氣都冇用, 要全身麻醉... 唉... 為咗2隻牙仔全身麻醉... 媽媽又唔係咁想, 始終都有風險... 唉!

媽媽成日係度諗: 然然果對門牙仔, 係媽媽肚入面的時候, 已經藏咗係佢牙床入面, 係媽媽送俾佢的禮物, 估唔到對門牙仔只係陪咗佢一年半就咁跌爛咗, 太可惜喇!

哥本善良!

雖然...
哥哥成日因為好小事爆喊, 歇斯底里咁"典"地,
但係...
佢其實係一個心地好善良, 性格好純品的小朋友!

雖然...
哥哥好似咩都唔驚咁, 乜都搞一餐, 經常出意外,
但係...
佢其實都有D野驚, 就係行雷閃電(呢樣野, 佢仲驚過細佬), 佢會話: 有閃閃閃, 跟住boom boom boom! 然後叫媽媽拉埋個窗簾!

雖然...
哥哥成日同細佬爭玩具,
但係...
佢係玩具反斗城搵到架直升機好好玩, 佢會叫埋細佬: Come! 細佬尋晚唔見咗架車車, 佢會俾自己架車車細佬玩, 仲會幫細佬周圍搵 (反而細佬自己唔搵, 只係顧住玩其他車車)

雖然...
哥哥成日扭計, 激到媽媽死死吓,
但係...
當媽媽話: 驚驚(有昆蟲)
哥: 哥哥唔驚
媽: 你唔驚, 咁你保護媽媽得唔得呀?
哥: (即時過黎好大力咁雙手攬實媽媽)
媽: (即時甜到漏)

孖寶兄弟下水禮2015

媽媽每年都好想帶孖寶兄弟去游水水, 因為媽媽惟一鍾意的運動就係游水水!

記得孖寶兄第一年游水水係6個月大, 爸爸仲買咗個頸Cool水泡, 但由於佢地實在太細個, 都唔係幾適宜去泳池游水水, 所以只係係屋企個浴缸入面游, 鍾意冒險同新奇玩意的哥哥, 當然游得好開心啦! 仲識得係水中轉身添! 至於細佬, 一幫佢戴個頸Cool水泡就已經爆喊, 擺佢落浴缸全程喊, 搞到哥哥都喊埋一份!

孖寶兄弟第二年游水水係歲半大, 爸爸淘咗兩套兩件頭長袖泳衣連泳褲俾佢地, 由於已經識行識走, 所以可以落去屋企樓下個泳池度游水水, 當然佢地只能夠係泳池邊玩水, 由於哥哥唔驚水, 爸爸會雙手托起佢, 俾佢試下踢踢腳扮游水, 至於細佬仔, 佢都係驚水, 初頭唔敢落水, 一去到池邊就話要走, 但玩玩下, 佢就鍾意咗玩水, 仲玩到唔捨得走添! 不過, 細佬唔小心仆低跌咗落水, 好在媽媽眼明手快, 撈返起佢 (但已經喊死佢喇! hoho...)

今年係孖寶兄弟第三年游水水喇! 由於搬咗屋, 屋苑會所泳池有更衣室, 哥哥同細佬可以各自跟爸爸同媽媽去換衫, 不過, 佢地面對更衣室咁陌生的環境, 又喊又扭一輪計, 然後先至搞掂可以跟爸爸媽媽出去游水水, 哥哥繼續係一D都唔驚水, 係個BB池入面行黎行去, 反而媽媽就好擔心佢會仆低跌落水, 細佬就一於企定定係池邊玩水, 不過, 後來爸爸鼓勵佢, 佢都肯係BB池入面行吓!

夜間親子活動

話說以前住的地方, 係荒蕪一片, 入夜之後, 街燈昏暗, 街上的行人寥寥可數, 晚上出街的話, 夏天熱到標汗, 冬天寒風刺骨, 所以入夜後最好都係唔好落街好D!  當時, 爸爸sell媽媽賣咗層樓, 搬去而家住緊的地方, 經常會講: 嗱! 第二時搬咗就可以晚晚帶BBS落樓下商場行下, 夏天唔怕熱(有冷氣), 冬天唔怕凍(室內)! 不過, 搬咗黎大半年, 只係約兩星期前開始, 爸爸先至肯食完飯帶BBS落去商場行吓(當然係因為媽媽'鵝'咗爸爸大半年的結果啦!)

食完飯, 同BBS落街行商場, 究竟有咩好做呢?

1.  行超級市場
BBS話去街市買餸餸, 佢地最鍾意坐超市架購物車, 哥哥可能覺得所有同車有關的野都係搵爸爸, 所以佢唔俾媽媽推佢架車, 佢指定要爸爸推, 兩兄弟最鍾意睇魚魚, 媽媽會乘機教佢地生果、食物名稱...

2.  行玩具反斗城
媽媽呢幾個月行玩具反斗城的次數多過前半生的總和, 幸好佢地未識扭計買玩具, 每次都可以成功離開

3. 行文具舖
又係去睇玩具車, 媽媽好悶啊! 順便會去埋隔離間寵物舖睇兔仔, 哥哥每次見到D兔仔都會好興奮

4. 去買零食
佢地最鍾意食果汁豬肉乾, 媽媽都會睇吓有冇BB餅買俾佢地食

5. 揸車去TKOP會所玩
因為自己屋苑個會所已經去到悶晒!

6. 揸車去行AEON
媽媽成日想去睇吓BB衫/用品, 但係2隻野就去咗睇玩具車, 一係就去冒險樂園, 哥哥仲要玩到唔肯走(賴死係架車上面), 媽媽好悶啊!

7. 去買雞蛋仔食
飯後甜品輕食, 一家四口share一底雞蛋仔, 買完企係街邊食, 好幸福啊!

8. 去食糖水
爸爸成日引誘媽媽去食, 成日望住樓下對面街間糖水舖話: "椅! 未有人排隊喎! 落去食糖水囉!" 細佬仔好鍾意食糖水, 有次佢同爸爸落街買糖水俾媽媽食, 哥哥沖完涼出黎見到細佬仔走咗, 喊住話要換衫落去, hoho!  最近一次落去食糖水, 係上星期五(因為爸爸由星期三開始話落去食糖水), 叫咗一杯朱古力乳酪雪糕, 一杯芒果豆腐花, 食食吓天花板突然跌咗一推黑色粉末落黎, 結果糖水舖整返兩杯俾我地(其實已經食咗一大半), 又食過, 最後四個人都飽到食唔落, 糖水舖仲俾個9折我地, 抵讚!

準備返學(2)

仲有唔夠3個月, 孖寶兄弟就要返學(今年9月直入K1), 由於冇讀過N班, 媽媽有D擔心佢地唔想/鍾意返學, 於是不停咁灌輸「返學好好玩」的正面訊息俾佢地!

除咗上次註冊日俾佢地發現咗學校入面有滑梯玩之外, 返學仲有好多野都係好好玩, 其中一樣就係個"書包"!

書包對孖寶兄弟黎講究竟有幾好玩? 細佬玩過一次之後經常嚷著要拎個書包出黎玩, 同埋情願玩書包, 唔玩車車, 可想而知書包有幾好玩啦! 咁書包係點玩架? 以下係書包的各種玩法:

1. 拉開拉鏈 --> 擺本書入去 --> 拉返埋拉鏈 --> 完成

2. 拉開拉鏈 --> 拎晒D餐具出黎 --> 每個餐具揭開個蓋再閂返埋 --> 將D餐具續一擺返入書包 --> 拉返埋拉鏈 --> 完成

3. 孭起個書包 --> 扮返學 --> 模擬落雨 --> 要擔遮(用煮飯仔個pan pan扮遮) (請參考圖1a及1b)

4. 孭起個書包 --> 扮返學 --> 模擬要搭校巴(自己捐入去架帳幕巴士入面, 自己做埋校巴司機)

5. 孭起個書包 --> 扮返學 -->  模擬自己揸車返學(揸自己架Thomas豬仔車) (請參考圖2)

6. 孭起個書包 --> 扮企係學校門口等媽媽接放學 (請參考圖3)

 圖1a
(註: 原來擔遮係要黎遮住隻眼)

圖1b
(註:準備上校巴)

 圖2
(註: 細佬話自己揸車返學喇! 同媽媽say goodbye!)

圖3
(註: 個書包好似龜殼咁, 爸爸話向後跌低有保護作用, 好幾喎! wakakaka...)

孖寶兄弟2歲半喇!

6月3號係孖寶兄弟2歲半的大日子(媽媽竟然唔記得咗!) 不過, 當晚食完飯, 爸爸揸車車帶孖寶去將廣行街街, 又睇玩具, 仲買雪糕食(不過孖寶唔鐘意食抹茶味雪糕, 所以冇食), 都叫做慶祝咗啦!

Update一下孖寶兄弟的近況:

1.  兩兄弟多咗互動

佢地的互動通常都係爭玩具, 爭叫媽媽抱抱, 鬧交, 不過呢排多咗一齊玩, 包括: 1)互相對望, 引對方發笑(最鐘意係媽媽幫緊其中一個刷牙時, 搞搞震), 2)一齊做同一個動作, 通常哥哥做先, 細佬跟住又做, 3)傾計(用外星話), 所以媽媽都唔知佢地講乜

尋晚細佬扭計喊喊, 媽媽抱住細佬, 哥哥突然對住空氣講: 傻豬, 唔好喊喊! 媽同爸爸相信哥哥係想同細佬講, 於是媽媽抱住細佬踎低, 叫哥哥同細佬講多一次,

哥哥: 傻豬, 唔好喊喊! (自言自語)哥哥玩緊呢個(爸爸剛淘返黎的玩具保齡)
媽媽: 係呀! 哥哥, 叫細佬唔好喊一齊玩
哥哥: (望住細佬) 唔好喊喊, 一齊玩!
(細佬真係即刻唔喊, 落返地同哥哥一齊玩, yeah!)

2.  兩兄弟的語言能力繼續進步

細佬講野係經過思考, 已經唔係執人口水尾, 例如:

細佬: 爸爸(個身)痴立立
爸爸: 咁點算呀?
細佬: 要沖返乾淨佢 (佢唔係話沖涼咁簡單!)

細佬: 頭先坐爸爸車車, 食包包 (佢應該係講緊上星期日買麥當當上車食, 但證明佢記憶力超過10秒, 叻過金魚, wakakaka!)

細佬識得用形容詞同比較詞, 例如: 大D, 細D, 好遠, 好高, 好長, 好多

哥哥其實係面懞心精, 佢都識思考, 例如: 佢會叫爸爸幫佢砌樽樽(保齡球D樽), 因為佢都知砌樽好嘥時間, 但撞跌晒D樽只係一秒的事! 哥哥最近講多咗好多野(有時仲多野講過細佬) 佢成日講的句子包括:

1) 抱唔到兩個 (當兩兄弟一齊扭媽媽抱時)
2) 唔食得, 唔玩得, 唔行得, 唔睇得 (如此類推)
3) 小朋友 (佢識得稱呼佢D同類為小朋友)
4) 瞓覺覺先 (通常叫佢食飯時, 佢就會講)

上星期日去探朋友(有個大女3歲, 而家陀緊對孖仔), 孖寶兄弟多野講過人地個女, 可能兩兄弟真係有個伴, 野都講得多D既!

3. 體格及體能發展

兩兄弟好似冇乜點高到/重到, 同2個月前差不多, 哥哥終於都識吹bubble(之前係噴晒D口水出黎), 細佬平衡力都有改善, 去兒童遊戲室玩障礙軟墊都可以唔駛拖住, 自己行

當上新手媽媽後......

最近看到網上一篇關於新手媽媽的文章, 當中提及很多新手媽媽的共通點(遇到的問題及難處), 很有同感, 自己也當了30個月的新手媽媽, 也有以下的體會:

1.  身邊從來沒有人提過帶孩子是那樣辛苦的;

2.  以為餵"夜奶"的時間是指晚上11-12點, 原來半夜2-3點以及4-5點都是餵夜奶的標準時間, 還未說每早晨6點的"早奶";

3. 原來初生嬰兒每3小時吃一次奶, 當中1小時用來餵奶, 1小時(甚至更長時間)用來掃風, 另外一小時是安撫哭鬧的寶寶, 然後又是另一個循環;

4. 自己所有日常生活, 包括刷牙、洗面、換衣服、上洗手間、洗澡、用飯、以及睡眠均須要以光速來進行;

5. 日間的工作變成兼職, 放工後必須於半小時內趕回家中當正職, 這份正職的待遇比兼職還差, 無薪金, 無假期, 無休息, 無員工福利, 無晉升機會, 僱主也不會體諒/欣賞你, 而且工作量只會越來越多;

6. 感覺像警方替疑犯錄口供的情況, 疲勞轟炸, 不准睡覺, 因為當你累得終於可以躺下之際, 哭聲就會響起, 你又得馬上趕去抱抱並加以安慰;

7. 精神衰弱, 經常幻聽(不知那裏傳來的嬰兒哭聲);

8. 經常半夜起來, 查看孩子是否仍然有呼吸及體温, 以及幫患濕疹的孩子狂塗保濕霜;

9. 進急症室的次數, 比進戲院的次數頻密;

10. 不准擁有私人時間, 因為你所有的時間都屬於孩子的;

11. 逛商場時, 眼睛只會看到嬰兒服裝/用品部; 每次血拼後, 整袋都是孩子的戰利品, 自己卻一件都沒有;

12. 淘寶時, 總是鍵入"嬰兒"、"兒童"來搜尋;

13. 逛玩具反斗城的次數比自己前半生的總和還要多;

14. 完全不想跟老公呦呦, 只是保持每星期呦呦一次以防老公到外出吃快餐;

15. 心底裏經常埋怨身邊人沒有幫手/出手, 身邊人總是機不離手;

16. 終於明白為何世上只有媽媽好, 而不是爸爸;

17. 兒時遺忘了與父母相處的回憶又再一次從現腦海;

18. 小時候經常被母親打駡, 發誓當媽媽後不會打駡孩子, 現在卻又偶然忍不住打了孩子的小手一下;

19. 原來做媽媽要很堅強, 不可以哭, 但卻又經常躲在睡房偷泣;

20. 很想孩子快些大, 又很不想孩子大得太快, 很矛盾;

21. 精神分裂, 見不到孩子時, 經常牽腸掛肚, 見到孩子(哭鬧)時, 很想離開現場, 或乾脆打暈孩子;

22. 自己的"良心"經常被當成"狗肺", 例如, 煮飯給孩子吃, 天氣冷時替孩子穿衣, 然後想起當年自己也是這樣對媽媽, 很想對她說聲對不起;

23. 變得多愁善感, 看有關親情的電影時需自備大量紙巾, 以防缺堤;

24. 因為孩子的病/問題(例如濕疹, 跌斷門牙), 搖身變成有關方面的專家;

25. 經常暗地裏批評某某親戚/朋友/同事, 甚至路人甲, 是怪獸家長;

26. 明明覺得亦體會過帶孩子上playgroup跟本毫無作用, 仍然繼續幫孩子報讀playgroup;

27. 惟一的需要是睡眠, 惟一的娛樂也是睡眠;

28. 突然發現自己只是比家裏的工人高一級而已, 因為每晚吃飯都要待老爺, 大少, 二少先吃飽, 然後才能吃他們剩下的冷飯菜汁;

29. 突然與同樣有孩子的朋友變得投契; 同時也無法再參與未有孩子的朋友的聚會/活動;

30. 每次帶孩子出街就像決定去非洲流浪一樣, 日常用品, 食具, 食水, 乾糧, 清潔用品, 尿片(大量), 外套, 雨具, 玩具, 出門前還得檢查清楚確定沒有遺漏