超級車車粉絲!

孖寶兄弟唔知係俾爸爸「教壞」, 抑或男仔真係天生鍾意車, 兩個都係超級車車粉絲!

細細個已經好鍾意睇Thomas & Friends, 每次搭地鐵, 見到架車埋站都會好興奮, 大叫: "Spencer!", 落咗車都要企定定睇住架地鐵離開月台, 同架車講埋Bye Bye先至肯走。

每次行商場, 見到有車展都會興奮到大叫, 然後拉住媽媽去睇車車, 仲要續架車上去睇吓(哥哥仲要坐晒每一架車的司機位, 扮爸爸揸車車!)

上playgroup最開心就係放學時候, 老師派貼紙(通常男仔就係俾反斗車王貼紙), 返屋企全程拎住張貼紙, 又貼係手背上面不停欣賞!

佢地對有關車的電視節目都好有興趣, 連逢星期一晚明珠台的Top Gear都睇到眼定定, 結果個電視就俾佢三父子霸住, 媽媽冇得睇電視!

哥哥仲好認得爸爸架車車, 就算同一款型號, 只係睇架車個pat pat, 已經知道呢架唔係爸爸車車, 爸爸車車係果度! 勁!

29個月, 哥哥第三次入急症!

5月17日(星期日)

今次係媽媽一時大意, 冇好好睇實佢, 佢係一級樓級踏空仆咗落黎, 媽媽見到已經接唔住, 抱起佢已經成口血, 下唇裂咗, 甩咗一忽肉, 上排一對門牙爛咗(唔係崩咗咁簡單, 打斜冇咗差不多一半), 心痛到我想死!

當時仲要扮冷靜, 同老公講, 唔得, 似乎要入急症, 老公即時抱起細佬(因為去咗尖沙咀某商場行街), 飛車去最近的QE, 但分流站話佢次緊急, 要等2個鐘, 加上我地之前仲有4母子撞車入院, 都唔知幾時先至輪到然然, 於是爸爸話返將軍澳醫院睇急症!

哥哥除咗即場爆喊之外(應該超級痛, 媽媽個心更痛), 佢上到車就累到瞓著咗, 但個口合唔埋, 傷口仍不停滲血, 唉! 詳細情況都唔想記錄咁多!

急症室醫生話下唇冇咗忽肉, 聯唔到針, 至於爛咗一對門牙, 要去睇牙醫, 但今日上網睇到其他媽媽話, 要全身麻醉, 杜牙齦, 做牙套, 唉! 全身麻醉...... 聽到已經好驚!

媽媽最唔開心係哥哥冇咗對招牌大板牙, 佢以前笑得好可愛, 咪起對眼, 突出一對大板牙, 唉! 今日睇返佢以前D牙仔相, 媽媽就好傷心, 喊咗N次, 諗起佢食野同講野發音都可能會有影響, 媽媽就更加想喊! 媽媽真係好內疚, 好自責, 成晚諗返當時情景, 怪自己行遠咗, 接唔住佢...

爸爸話, D牙會換既(但係要5年後喎, 做5年崩牙仔, 講野漏風喎!)

後記:
5月18日去咗睇兒童牙科, 原來唔係接受咗佢做崩牙仔就可以, 因為隻牙斷得犀利(都唔可以用崩黎形容), 醫生話已經見到牙仔入面紅色部份, 唔理佢, 細菌就會入侵牙腳, 長期發炎生牙瘡, 會影響恒齒發育(聽到好驚!) 而家只有2個方案: (1)脫晒2隻門牙(我真係好唔想佢做冇牙仔!) (2) 全身麻醉 + 杜牙根 + 做牙套, 唉! 我實在心亂如麻, 老公見到我咁, 就落咗1000蚊訂, 叫牙醫book做手術, 我都唔知呢個決定係唔係對佢最好...... 好想喊!

不過, 老公話, 經歷過呢件事後, 佢更加錫然然, 同埋我地都反省返, 有時覺得小朋友好煩, 好似好嫌棄佢地咁, 其實咁樣諗都唔係幾啱, 佢地真係我地的心肝寶貝, 要多D愛心, 多D錫佢地, 多D包容佢地!!!

5月27日再去睇政府兒童牙科, 由兩位高級醫生會診, 最後決定幫然然補返2隻門牙個缺口先, 減慢細菌入去的速度, 當然, 之前呢10日可能已經有細菌入咗去, 但係補返都好易甩返, 所以要一個月後返去跟進! 感恩醫生肯收佢呢個case, 又幫佢跟進, 希望最終都唔駛剝牙啦! 媽媽實在唔想佢做冇牙仔呀!!!

準備返學(1)

上星期六(5月9日)帶孖寶兄弟(已經唔可以再用BBS去稱呼佢地喇! 因為佢地兩個已經長大咗, 變成小男孩喇!) 去幼稚園買校服, 書包, 聽老師講解開課安排等等!

去到學校門口, 哥哥好開心咁彈吓彈吓, 細佬就離遠50米已經feel到唔對路, 唔肯行, 要媽媽抱, 不過, 校長同老師就係門口, 俾佢地見到仲要抱, 乜印象分都扣晒啦! 爸爸同細佬講, 哥哥都落地行喎! 佢都好聽話, 自己落返地行入學校。

由於interview果時係11月, 事隔半年, 兩兄弟長大咗, 對陌生環境同陌生人好似冇咁驚 (起碼冇爆喊!) 由於佢地係孖仔, 所以特別容易引來其他人的目光, 由學校門口行去課室途中, 分別俾校監, 校長同老師問: 邊個係哥哥? 細佬搶住舉手, 媽媽惟有講笑, 係呀! 佢好想做哥哥! hohoho...

入到課室交費用, 辦好手續, 細佬無啦啦同老師講咗句: Thank You! (簡直加晒分啦!) 見到其他都係黎辦手續的小朋友, 孖寶兄弟都唔算輸蝕(身高體型除外), 佢地都算精靈活潑, 又唔怯場, 又有反應(係咁指住課室D壁布板講: Spencer(地鐡), 星星, Dinasour!) 反而我見有D小朋友仲係懞盛盛咁樣!

之後入去另一個課室聽老師講解, 由於都等咗一段時間, 孖寶兄弟都有少少唔耐煩, 但冇扭計, 雖然老師講解其間, 佢地都嘈嘈地, 但老師叫佢地靜靜地, 聽埋老師講野先, 佢地都肯聽老師話(好神奇呀! 真係未見過咁聽話!)

最後入去禮堂買校服, XS碼的校服對細細粒的孖寶兄弟黎講, 都好似好大件咁, 連個書包都大過佢地, 孭咗上去, 好似會向後跌咁, 好好笑!

總結: 孖寶兄弟好似唔係好抗拒返學, 起碼佢地好鍾意個校園環境, 尤其條滑梯, 又肯行入課室, 仲係個禮堂入面跳黎跳去! 細佬仲主動同媽媽講: 返學好開心, 好多玩具玩! (媽媽都嚇咗一跳, 佢點解會識講D咁既野?! 勁!)  希望到開學後, 當佢知道原來媽媽冇得陪返學, 佢都仲講得出返學好開心啦!